التونسي مش متربي .. إلا من رحم ربي

يا تونسي يلي سبوه، يا تونسي يلي شتموه، يا تونسي يلي كفرو عليه، يا تونسي يلي قالوا بيه و عليه، يا تونسي يلي حقروه، يلي جبدولو أمو و بوه، يا شعب تونس تنفسوا الحرية، شيخوا بالتعددية، في الألفاظ الخادشة للحياء و اللا أخلاقية، سب و كفران و شي آخر ما نجمش نقولو ! أما انتم تعرفوه، و كل يوم تسمعوه، و بكل حزم تعاودوه، و للصغار تعلموه و لو كان ما جاش صنع بلادي راكم ملخارج استوردتوه.

حزني و أسفي كبيران، ألمي كبير جدا، كبير جدا على مخلفات زين الجرذان، أهيا تونستان، وينهم الطبالة و الزكارة من بني علمان ؟ وينو بسيس بهتان يجي يشوفلنا حل في هالخور. الكلام الزايد ولى كي صبلي نشرب، التونسي ياسر متعلق بأعضائه التناسلية، ما فماش نهار ما يذكرهاش على لسانو في الشارع و في الدار، صباحا مساءا ديمه يعمل  في الأذكار، هو مسلم مش كيما الكفار. هذي تونستان اللي يخوفو فينا بيها، تسب، تكفر، نورمال الي تعملوا يواتيها، بلاد تتسب فيها الأم، زنقة زنقة و في الحوم، على خاطر ماتش متع كورة، في وسط كمشة ذكورة، كمشة فروخ مازال حليب أمهم ما بين سنيهم، و جرب كلمهم و الا لوم عليهم ...

هذي هي تونستان الي يخوفوا فينا بيها بنو جهلان، بلاد يتسب فيها الواحد الأحد صباحا مساءا و يوم الأحد، و خاصة يوم السبت مع الدبوزة، المساند الرسمي لسب دين محمد و زيدهم الشايب و العزوزة، هذي تونستان بلاد ولّى فيها السبان و الكفران داخل في العادات و التقاليد، ما عادش كلام متع غش و إلا عراك ما بين بسيكو أم  و النوري بوزيد هههع لا هذاكا كلامنا العادي شبيك انت ؟ خلينا أوريجنال مش كيما بقية البلدان، التونسي وحدو في السبان، يا ولدي في جملة وحدة تلقى الإيمان و الكفران، يتلاقيان بكل انسجام، تعددية كوا، شبيك ديفازي واقفة عالبلار ؟ يا بنتي أهبط قداكش دمار !

أسفي عليك يا تونس الأم، الكلام الزايد ولادك يتناقلو فيه من فم ال فم، قلة الحياء تجري فينا مجرى الدم، ملا هم ! ناس لا يهمها كبير لا صغير، لا إلي يدبي عالحصير، لا تقدر راجل و لا تحكر مرا، يا ولادي إلى متى وين ماشيين بها الأزمة الأخلاقية؟ شبيكم عميتو و صميتو عفوا علينا شوية ! يزيونا مالألفاظ السوقية هلكتولها سترها العربية! شبيك كي تكفر تبدى بلي خلقك ؟ شبيك كي تسب تبدى بلي ولدك؟ شبيك مش متربي، ما تخافش من ربي، ضمنت على عمرك؟ يا ولادي من أنتم ؟ مكبوتين ؟ مخنوقين؟ ناقصين قراية و إلا معلومات في الدين؟ وين الملايين؟ الشعب العربي التونسي وين؟ هذي أمة بش تنصر روحها و تنهض ببلادها و تحرر فلسطين؟ شبينا قعدنا ما بين البينين؟ لانا عرب لانا فرانسيس، لانا كفار لانا مسلمين؟

ما نعرفش كيفاش وصلنا هكه، في بالي بيها مشكلة قديمة مالبارح مش من توة.  أما وينو البو، ويني الأم؟ و إلا غلطوهم زادة هوما في حجم الحقائق؟ حتى طلعلهم الولد عايق؟ إمالا هذي مخلفات الحروب الصليبية على دين سيدنا محمد، و لينا نعبدو في بورقيبة و نقدسو في مهند. وينو الإحسان، وينو الإيمان؟ ويني الأخلاق في بلاد الإسلام ؟ زين الجرذان كذب عليكم قاللكم الشباب هو الحل و ليس المشكل و أنا نقوللكم المشكل في الشباب المنحل و الإسلام هو الحل. و كلي إيمان أنو مشاكلنا الكل مردها إلى الأخلاق و الدين، و هل جاء محمد صلعم إلا ليتمم مكارم الأخلاق؟ أنا حكيت عالكلام الزايد و سب الجلالة و شفيع الأمة لكن الأزمة الأخلاقية أكبر من هكة : السرقة و الرشوة و القفة و صحة الرقعة (متع التجوعيين مثلا) والكذب و النفاق و المحسوبية برة يعطيهم شكية !

حاصيلو التونسي مش متربي .. إلا من رحم ربي .. و لذا حزني و ألمي كبيران و الله لا ترحمك في كلمة يا شين الغربان و أنستك بيها أم الصبيان  هه

أقولها و أمضي (معناها نبصم بالعشرة) مش كسي وخينا متع جهلبغل 

(هاذي خنتبتها في الكار تو عندي جمعة، النوم يكبي فيا و أنا قلبي عالجمعية، إي و لواش تحكيلنا؟ هكاكه شهوة صبية دبروا فيا ! )