السبت، 5 نوفمبر، 2011

الوصايا العشر في فن العيد الكبير والتكبير




كيما عملت في العيد الصغير، بش نجي نخطب عليكم في العيد الكبير، تحملوني ميسالش. هوكة فما نقاط بش تتعاود، سامحوني عالتكرار..
سيداتي، أوانسي، سادتي، أوصي نفسي وإياكم بما يلي :
1)    أولا وقبل كل شيء التعييد يجي بعد صلاة العيد ونتصور كي تقول إن شاء الله عيدك مبارك تاخو ثواب أكثر ملي كي تقول عيدك مبروك الي ما عندها حتى معنى في اللغة العربية خلف اسم أكل الراجل الي كنا نقراو عليه في المكتب : "هذا أبي مبروك"

وبش نزيدو نتثقفوا : كان أصحاب رسول اللَّه صلى الله عليه وسلم إذا التقوا يوم العيد يقول بعضهم لبعض:تقبل الله منا ومنك

2)    الناس الي تصلي صلاة العيد كي توفى الصلاة ما ذابيكم تعيدو علْي بحذاكم الكل الي تعرفوهم والي ما تعرفوهمش، مش آخر يد في الصلاة نهز شلاكتي ونهرب سقيا أعلى من راسي بش ما نبوسش فلانة وما نسلمش على فلتانة قال شنوة ما نعرفهاش ولا نحسب روحي نحكي في البورطابل ولا نبدا نتصوعب بش ما يكلمني حد. في بالكم الي من علامات الساعة أنو الناس ما عاد تكلم كان الي تعرفهم؟ عالأقل في العيد نتفكرو أخلاق الإسلام ونفشيو السلام.


3)    بالله كي تواتي جماعة جيران وإلا أخوة يذبحو برشة أكباش مع بعضهم ماذابيكم شوية إنسانية مع كالمخلوق الي ربي بفضلو سخرهولنا. خرجوهم بالطريق، مش لازم العلوش يرا خوه ويتذبح 100 ذبحة قبل ما يجيه الدور وسيدنا النبي صلى الله عليه وسلم نهى عن ذبح حيوان أمام حيوان آخر وزيد نهى أنك تمضي السكينة قدامو.

4)    خلينا في السكاكن بالله مضيوهم مليح يهديكم، مش تشدوا العلوش تجُروا عليه بال200 مرة تردوها navette مالوريد للوريد، حرام عليكم.

 عن شداد بن أوس ، عن رسول الله صلى الله عليه وسلم قال: " إن الله تبارك وتعالى كتب الإحسان على كل شيء ، فإذا قتلتم فأحسنوا القتلة ، وإذا ذبحتم فأحسنوا الذبح ، وليُحدَّ أحدكم شفرته وليُرِح ذبيحته " رواه مسلم

صلى الله على محمد صلى الله عليه وسلم والله أكبر ما أحلى ديننا

5)    باهي ذبحتو ça y est؟ غطستو في الدمومات؟ وفات الحوصة؟ دوش ولبسة نظيفة وبرفام يهديكم، مش الناس تجي تعيد عليكم تخرجولهم كالسفاح متع الميسيسيبي.

6)    مانيش بش نوصيكم عاللحم ما تكثروش لا تبشمو وانزلوا عالحشيش (السلاطة) وكاللوغة متع حي الدرابك خاطر بان بالمكشوف (وبالمناسبة التعيسة هاذي حزني وأسفي كبيران وألمي كبير جدا كبير جدا ) الي نسبة الفقر في تونس 24%، معناها تونسي على أربعة مشتاق لحاجة اسمها لحم علوش وإلا لحم tout court وعليه، فإني أوصيكم بش تاكلوا اللحم لين تفدوا شماتة في الفقر والتحتحيت الله يقطعهم مالبلاد.

7)    يقول القائل تو أكل الناس الي على قدهم منين جاهم بش يشريو علوش ويفديوا لقديم والجديد؟ هكاكة سيدي خويا بابا عزيزي كان جاو المسلمين متع آخر زمان فاهمينو العيد علاش مجعول تو ما يجوع حد في هالبلاد. أيا للي ما يعرفش وإلا الي يعرف وعامل فيها مهبول يعيش حلوا  وذنيكم مليح، ça va el sono من غادي؟ تسمعوا فيا؟ ساعدوا لا تشرقوا :

كانت السنة في توزيع الأضحية أن يقسمها أثلاثًا، ثلث لنفسه وأهله، وثلث لمن حوله من جيرانه، وثلث للفقراء والمساكين..ولو تصدق بها كلها لكان أكمل وأفضل، إلا بعض الشيء يتبرك به ويأكل منه.

التعليق الوحيد الي يجي على بالي : هههههههههه خلف بابا ما نعرف حد يطبق فيها هاذي، جاهلة الله غالب ..

8)     كالعادة  يزينا مالبدع متع الانترنات ومجتمع المعلومات وعالم الاتصالات الي فرق لعباد وبعدنا على بعضنا و أحنا فرد بلاد، التعييد عالأقارب والأحباب بالتليفون مش مقبول وما عندوش مبرر خاصة للي عندهم الجهد والصحة والفلوس بش يتحركو. والله عملنا العار الخو يبعش لأختو ميساج ؟ تي ما خيب راسك Digage. وزيد تلقاه ميساج من طرحة الملابس الجاهزة، لا لون لا طعم لا رائحة.

أما الفايسبوك حدث ولا حرج.. يزي ما حكيت عليه المرة لخرى


9)    بالله العلوش حوصتو حوصة خاصة في تونس مبدعين، لا يسلمو في الراس ولا في الساقين، لا في الجلد ولا في اللسان، وزيد على ما بينا تنظيف الدوارة و خياطة العصبان (يا رسول الله) ولذا يلزم تظافر الجهود والتكافل الاجتماعي وتثمين دور الأسرة في القضاء على كل مظاهر الحياة في جسم العلوش.. بالعربي وتعاونوا .. مش كل شي توحلوه في راس النساء.   


10)    ان شاء الله كان هدانا ربي وتقابلنا و صلنا الرحم قول وفعل مش بالتليفون و الفايسبوك يراه مهلوك .. ما توليش الاجتماعات العائلية فرصة للتقطيع والترييش والحركات الرياضية بالفم والعينين بالغمز واللمز و توقيف الوذنين، يهديكم راو الدين أخلاق، يزينا مالكذب في القول والصدق في النفاق. وما تبداوش تتفوخرو بقداش من كيلو لية جملتو وقداش من ميترو مرقاز حصلتو، يزيوا مالفخرة الفارغة.

ختاما عيدكم مبروك (هي هي زلقت بيها) وكل عام والشعب التونسي يتيم لا يعيد عليه لا المبزع ولا بوه لحنين، الحمد لله وربي يرحم الشهداء عمناول في ال7 نوفمبر نرمي في المعنى بالسيف وخايفة لا يسكرولي الحوينتة ههه ومن غدوة صبحت عالبوق متع صوف الصنادق (صوفية صادق) تكسرلي في راسي عالأمن والأمان وبرشة حاجات عمري ما ريتهم كان في الأفلام .. في كالشعبة المدبغة الي بحذا خدمتي. ليوم صارت خلاء وقفار فالحمد لله العزيز الجبار

كل عام و الشعوب العربية تنتفض على متحكميها أحكم الله قبضته عليهم.

عيد ليس بسعيد و الأقصى شهيد

عيد ليس بسعيد للمتشردين في الصومال

وللمحرومين في غزة

وللمفجوعين في سوريا

وللمكلومين في اليمن

وللمنسيين في تونس..

لكن عيد مبارك .. بأية حال وسبحان الله مغير الأحوال القوي القدير المتعال.

الله أكبر الله أكبر لاإله إلا الله.. الله أكبر الله أكبر ولله الحمد

هناك 8 تعليقات:

  1. أيا قلنا السلام عليكم :)
    نعاود نعطي رأيي مرة أخرى و لا سيب علينا هههه
    بارك الله فيك على التذكير و إن شاء الله ... غدوة نعيدو هههه
    ربي يفضلك الوالد و يهدي الجميع
    و ربي ينصر اخوتنا المستضعفين في كل مكان :)

    ردحذف
  2. ليلي

    وعليكم السلام ورحمة الله وبركاته

    عيش أختي ربي يفضلك

    آميييين

    :)

    ردحذف
  3. وذكر فإن الذكرى تنفع المؤمنين :)
    صحيتك يا سسمك، و "عيدك مبروك" :p

    ردحذف
  4. @ Wael : إن شاء الله :/

    اسمي فتحية :D

    عيدك مبارك وربي يحييك لأمثالو :)

    ردحذف
  5. عيدك مبارك و سنين دايمة للتذكير نقول عيدك مبارك من فعل بارك"بارك الله فيك" و عيدك مبروك من فعل برك "برك الجمل" لواه بربي تبرك في عيدنا ؟

    ردحذف
  6. waw j'aime beaucoup bravo ammoun w nchala 3idek mabrouk :)
    imen_gh

    ردحذف
  7. @ Anonyme : justement menich nbarrek fih, nbérek fih :p

    @ Amouna : wena tfakartek, 9olt wini 3andha barcha ma talletch 3leya fi 5erbti xD

    mar7bé bik chérie et merci :*

    ردحذف
  8. اوّلا و قيل كلّ شيء تقال ميارك و مبروك (كلاهما اسم مفعول) معناها لا خطأ في قول "عيد مبروك"ا

    ثانيا منين جبتها حكاية التعييد بعد الصلاة؟

    ردحذف