الأربعاء، 12 أكتوبر، 2011

بعد ما شابت هزوها للكُ تابت



و أخيرا سهل ربي ومشيت ليوم للجمعية القرآنية بحذا جامع الفتح في بنزرت. قيدت في أواخر سبتمبر (وأنت وقتاش بش تقيد؟) وقالولي الدروس يبداو في أكتوبر. مشيت ليوم ياخي الحمد لله لقيتهم في أول درس. على أول ما دخلت استقبلتني أصوات الصغار يقراو في القرآن وريت ملصقة عالحيط لوائح بأساميهم .. الأطفال .. محلاها كلمة ومحلاه الواحد كيف يحفظ ويتعلم القرآن وهو صغير مش كي حالي بعد ما شاب هزوه للكتاب ..هرمنا عمري 29 سنة، لا تباركلك يا بن علي..يعطك داء !

تفكرت كيف كنت صغيرة متنقلة للسنة الثالثة ابتدائي .. أنا وأختي التوأم قيدونا في الروضة الإسلامية. في الصباح عالخوى نحفظو القرآن على يدين سي فوزي التومي .. هوكا يجيبوه ساعات في حنبغل .. وبعد مرتو تقرينا الحساب وتسبقلنا في جدول الضرب متع وذني. وكان سي فوزي صعيب، تبسيمة لا و كي ريتو في التلفزة حسيت الي شي ما تبدل ..

 مرة حلمت الي غلطت وعطاني طريحة، صبحت عالصباح نحكي فيها ال أمي وأخوتي..أمي قتلي ما عادش تحكي حلمة خايبة راي تصير.. قعدت يدي على قلبي ومشيت نهارتها وأنا نعس عالتنفيسة وندعي في ربي بش يتعدى النهار على خير.. وقداش فرحت كيف وفات الحصة وما صارلي شي، مشيت كالعادة بش نقرى شوية حساب، المعلمة خرجت وقالتلنا هاني راجعة، مشات وجات تلقاني فوق الطاولة نصيح ولا انقز ولا نشطح برا لوج .. المهم فرحت بيا وعملت معايا اللازم وعلمتني نهارتها شنوة معناها جدول .. الضرب. كليت ما كتب وروحت إلى البيت فرحا مسرورا، في الآخر الحلمة تحققت في يومها، شنوة هو ولا مرتو؟ كيف كيف المهم طريحتي كليتها هههه

يا حسرة .. تو كبرت ما عادش متع ضرب .. ونسيتو جدول الضرب .. كالنهار قدام بياعة الكتب 9*8 ما لقيتهاش بالوقت، جاب ربي ما قلتلهاش راني مهندسة ههه يزي هوكة حشمت قدام روحي فيه البركة .. ما خيبها البركة، كنا باركين عنا توا بالقليلة 23 سنة، بن علي كان محرم علينا الخبز والماء، خبز الروح والماء الي يرد الروح، الناس كانوا يتقابلو بالسرقة في ديار بعضهم بش يتعلمو القرآن، كل مرة في دار يدخلو ويخرجو بالواحد بالواحد يا ولا حوال هاذي بلاد ؟ هذا مش هبال؟ الحمد لله ما دام الحال..

الحمد لله وربي يرحم الشهداء، . سألت بعض الأخوات وين يقريو؟ وراوني السال دخلت، السلام عليكم.. نلقى الأخت الي تقري فينا ما يجيش عمرها حتى 20 سنة، صوتها يلعلع تبارك الله، واثقة من روحها وصبورة وعارفة روحها علاش قادمة.. القاعة كبيرة برشة وفيها طواول وكراسي وديكور متع صغار.. أنا قعدت في صفة الصغار .. ههه الي ما بين ال20 وال30. ومقابلتنا صفة النساء الكبار مال45 وأنت طالعة .. منهم مرا كبيرة بالقدا كي جاتها ورقة الحضور قالت للمعلمة ما نعرفش نكتب بالعربي هاو بش نكتب بالسوري .. ناري عليك يا تونس ..ههه

ضحكت المعلمة وقالتلها ميسالش مالا تمشي تحضر مع جماعة محو الأمية تو يبداولك بال ب و ال ت .. قالتلها المرا أي باهي أما تو بش نكمل معاكم الحصة هاذي أنا داري بعيدة... وقتها بصراحة تنرفزت قلت برا عاااد بش تعطلنا هاذي.. ياخي كان تلهيت في همي وجهلي كان خير .. الله لا تربحك يا بن علي (مرة أخرى) خاطر العز هذا ما كانش متوفر.. بدينا يا سيدك بن سيدك بسورة مريم وما أحلاها من سورة..

كهيعص

أول آية عدينا فيها ما كتب من ربي وبديت نتعلم في القواعد وحروف المد ونقص عسلكم والتقميرات بأبيات الشعر لحروف الإخفاء والإدغام وووو ..وكل وحدة فينا تقرى .. أول وحدة مرا مسكينة تهجي، تحسها عندها مشكلة في العربية أصلا فما بالك بالتجويد .. والي بعدها صوتها عالي وتحسها فرحانة بيه والي بعدها أمنا الي مسكينة مزالت ما تعرفش تكتب بالعربي والي طلعت ناس ملاح ومالي كنت نغزل عليها وليت نحبها  ثم مرا أخرى ما شاء الله صوت وتجويد.

وأخيرا ننتقلوا إلى صفة الأطفال الي قدي وأصغر هه فما زوز بنات طلبة لولى تبارك الله صوت وقراءة والي بعدها صوت نسائي غاية في الرقة كاينها تغني .. والمعلمة تقلهم أحسنت ثم جا طريق الطفلة الي بحذايا طلعت على قدها مسكينة و أخيرا جا طريقي كهيعص بكالصوت الهايل متاعي ما قتليش أحسنت المعلمة والي بعدي أتعس وأتعس هه تعاسة

شنعمل ال عمري ؟ هاذاكا صوتي الحمد لله مش خايب أما البنات صواتهم ياسر باهيين، الغلطة غلطتهم وزيد طلعوا قاريين من قبل مش كي حالي أجهل من صباطي في ميدان التجويد والتلاوة (ما نعرفش الفرق بيناتهم بالضبط هاذوما) حاصيلو ما حسيتش بالوقت .. قلت سبحان الله كان جيت في ساعة تاريخ ولا عربية ولا الي هو راني روحي طالعة ..

خرجت راسي معبي بالقواعد الي تعلمتهم .. فرحانة وفخورة ببنات بلادي ونسائها المتعلمات العالمات الي يعلمو في الجهلة الي كيفي كيفاش يتقرى كتاب الله و فما دروس في السيرة والحديث والفقه وعلوم القرآن وهذا الكل بلاش، ما عندك كان معلوم الانخراط في الجمعية 30 د سنويا ... لكن فما شكون حتى ال30د هاذي تصعب عليه. أنا واقفة نسأل عالأوقات .. وفما طفلة عينيها يلمعو بالفرحة قتلي أنت أول مرة تجي؟ قلتلها أي، قتلي حتانا ماللي سمعت جيت نجري .. مسكينة طالبة ربي ينجحها والمرا الي لاهية بالتقييد قالتلها تجم تخلصها ال30 بالتقسيط في عقلك .. قالتلها الطفلة أي من مصروفي .. لازمني بالشوية.

برا شوف مصروفها قداش ومع هاكة بش تحاول تفضل منو طلبا للعلم .. قداش شي يعمل الكيف، نغزرلها كايني طفلة صغيرة نهار العيد .. ربي يثبتها ويوفقها .. وربي يعاونا الناس الكل، ديما بين عينيا حديث الرسول صلى الله عليه وسلم : خيركم من تعلم القرآن وعلمه ..

وحسب تجربتي البسيطة جداااا كي تتعلم القرآن على أصولو تولي تحشم على روحك بش تقراه "نورمال" كاينو شكون يجري وراك، كي تتعلم التجويد تولي تخشع أكثر في الصلاة وتتمتع بيها، كيف كل حرف تعطيه قدرو وتنطقو في حقو تستشعر أكثر عظمة الخالق الي أنت واقف بين يديه وتحاول تحسن صوتك وقرائتك كاينك في اختبار من اختبارات الدنيا ... وخاصة إذا كان الإنسان يشغل وقتو بتعلم القرآن ما عادش يلقى وقت للتفاهات وما عادش يحمل يسمع سقط المتاع مالأغاني المايعة الي تهيج الغرائز والكلها حب وكلب وآهات .. قلبك إذا تعبى بالقرآن وقوى فيه اليقين والإيمان معادش يحمل لهو الحديث واللغو والبهتان .. ربي يهدينا ويهديكم لطريق الرشد ولتعلم القرآن ..

حاصيلو أنا نقرى (محلاها كلمة نقرى قداش توحشتها .. بكاتني) نهار الأحد ان شاء الله من الساعة 14 للساعة 15.30 . سويعة ونص في الجمعة والباقي اجتهاد شخصي، المسألة مسألة همم، ان شاء الله ناوية نشري كراسة وأقلام ملونة بش نقيد فيها القواعد الي تعلمتهم، نحب كراستي مزينة وفيها عصافير، نحب نشري كتاب يعاوني مش هكة خير؟

 أنا بديت نقرا وأنت وقتاش؟ وقتاش بش تقرا باسم ربك الأعلى؟

والله لا عذر لنا بعد اليوم أبدا !  



هناك 19 تعليقًا:

  1. بارك اللّه فيّا12 أكتوبر، 2011 10:50 م

    فقرة 1، سطر 3 : ملصقة بالصّاد

    ردحذف
  2. @ yberek fik w feyya : hhhhh

    maw men ghir ma noch3or nekteb selon el phonétique bel tounssi, mais ki 9ritha ma 3ejbetnich j'allais rectifier men 9bal ma t9olli :p thanks anyway :p

    ردحذف
  3. بارك اللّه فيّا12 أكتوبر، 2011 11:09 م

    فونيتيك متاع "القننّوات" مش تونسيّة

    ردحذف
  4. sa7a 3lik wa barra, sa7a 3lik fi hal i7sas il 7assito, 5atir lazmo 9alb i7ib rabi bech i7isso!!

    ردحذف
  5. السلام عليكم
    بارك الله فيك
    يلزمنا توا ندعيو ربي يدوم علينا النعمة ون شاءالله يخليونا الشلاكيين و النساء اللا ديمقراطيات نتعلمو ديننا كيف مانحبو

    ردحذف
  6. @ IK_205 : baraka Allahou fik, ncHAllah el e7sses ydoum, w nched s7i7, .. j'ai écrit cette note pour encourager tout le monde à faire autant .. :)

    @ mouhamed : wa alaykom al salem wa ra7matou Allah wa barakétou

    lé lebes b9odret Rabi, menech nessannew fihom y5alliwna wala lé, ça y est lé 5awfa ba3da el yawm, yezzina ma t'thallina !

    wa fika berak :)

    ردحذف
  7. نشهدلك ... فكرتني في سي فوزي إمام جامع الفتح في جرزونه ( مانيش عارف هو نفسو إلي تحكي عليه ولا لا على خاطر هذا بشوش شوية !! ) وقت لي كنت نقرا "بريبا" غادي، من كثرة ما وليت أنا وياه أصحاب، في صلاة الجمعة إلي قبل الكونكور دعا لجماعة "البريبا" بالنجاح ... لقطة عمري ما نسيتها و عمري ما باش ننساها :) ... سدد الله خطاك يا أخت العرب و دمت ذخرا للوطن ... ( و الفايدة في اللمة و الجو :) )

    ردحذف
  8. saha lik kadéch nafrah kif nalka nés haka ya rabi yahdina ennes el kol

    ردحذف
  9. sa77a lik ammouna inchallah twassal wallah ena bidi konet naouia nemchi w ma sdo9ech
    bravo

    ردحذف
  10. ما شاء الله ، ربي يباركلك و يوسمك بوسام القران إن شاء الله،

    مازال الخير إن شاء الله ؛) وقت تقرا أول مرة بالصحيح، وقت تغمض عينك وتقرا من قلبك (بالحق من قلبك) وتحل عينك على صوت "ما شاء الله" " تبارك الله"، وقت تقرا وانت تعرف إلي الملائكة يتسارعوا بش يدعولك بالمغفرة والاكرام إن شاء الله :''') ... ما شاء الله..

    عن أسيد بن حضير قال: بينما هو يقرأ من الليل سورة البقرة وفرسه مربوط عنده إذ جالت الفرس، فسكت فسكنت، فقرأ فجالت الفرس، فسكت وسكنت الفرس، ثم قرأ فجالت الفرس فانصرف، وكان ابنه يحيى قريبًا منها فأشفق أن تصيبه، فلما اجتره رفع رأسه في السماء حتى ما يراها، فلما أصبح حدث النبي -صلى الله عليه وسلم- فقال: فأشفقت يا رسول اللَّه أن تطأ يحيى، وكان منها قريبًا، فرفعت رأسي فانصرفت إليه فرفعت رأسي إلى السماء فإذا مثل الظلة فيها أمثال المصابيح، فخرجت حتى لا أراها، قال: (وتدري ما ذاك). قال: لا. قال: (تلك الملائكة دنت لصوتك، ولو قرأت لأصبحت ينظر الناس إليها لا تتوارى منهم). [أخرجه البخاري ومسلم وأحمد وابن حبان والحاكم].

    بالتوفيق حبيبتي
    (ريمة)

    ردحذف
  11. chouf, milloul wallahi wa7di nedh7ak bil 7ess en plus mouch juste netbassem (balek el 9la9 zeda allahou a3lam) .. w min ba3d w9eft fi jomlet تجم تخلصها ال30 بالتقسيط في عقلك .. قالتلها الطفلة أي من مصروفي .. لازمني بالشوية ... wallahi bakkatni .. ama hethi ma najjamch n9oul mil 9la9, walla balek ? .. anyway .. j'adore ton style et merde alors je viens de découvrir ton blog j'avais déserté le monde du net tunisien depuis des années .. ou5ti 5amsa w 5miss 3lik .. w rabbi iwaff9ek ..

    ردحذف
  12. جوست من بابا احقاقا للحق :) بعلول خاطيه راهو لانو المدارس القرآنية كانت موجودة في وقتو و لكل الأعمارو حتى انها باعداد لا يستهان بها و ما عليهاش منع او حاجة من هالنوع :) أنا دخلتها في عهدو

    لكن يمكن توة الناس اقبلوا علاها اكثر :)

    بالتوفيق يا فتاة :*

    ردحذف
  13. wow j'ai du retard par ici !!

    Je salue tout le monde et je m'excuse pour le retaaard !!

    al salamou alaykom wa rahmatou Allah wa baraketou

    baraka Allahou fikom

    @ Chimère : chou kech eddefa3 3lih xD

    ey w ma 9otlich 3lech ennes taw a9blou 3liha akthar ? comme par hasard wa9t howa gatta3 :)

    Je sais bien que el madares el 9or2eneyya existaient avant, ma soeur jumelle zeda da5let tet3allam w ta7fath fi wa7da menhom (ena je pouvais pas, 5atar b3ida 3leya w j'avais une seule journée pour me reposer à demi quand je faisais la navette tunis bizerte) bref, tout ce qui est action humanitaire w lucrative était limité et je parle par expérience, el jam3eyya eli net3alam fiha, ta3raf ech ken el ma9ar mte77a 9bal ? ken bo2ra men bo2rat el fassed mta3 el RCD :) on m'a dit que el jam3eyya existait avant ama fi blassa o5ra moch ma3roufa .. w famma ness kenet tet3allam bel ser9a, famma nssé kenou ykalmou b3ath'hom fel tel w y9oulou ayya ijew bech n7ellou el ba9lewa, et ba9lewa était un mot codé pour dire apprendre le Coran .. ya benti 5alli 3zeha sket ..

    3aych o5ti, wenti zeda :*

    ردحذف
  14. و عليكم السلام :) شو كي تقلي ادافع عليه ههلول :)

    اقبلوا علاها اكثر لانهم ماشي فيبالهم قبل علاها منع :)

    هههه بقلاوة بون في سوسة نحس الامور واضحة ..في المستير كانت فمة مدرسة قرآنية كبيرة ياسر منظمة بالاقسام و الشهايد و كل شي :) يمكن كل ولاية و سيستامها ككك

    ردحذف
  15. neddakkek :p

    7atta ken ma fammech man3 direct, ama famma la pose de batons dans les roues, en tout cas Banzart men akbar ma3a9el el "islemeyyin" cf al jazeera :hihi: w Zaba 3mal fina kima 7ab w echthé dans tous les domaines :)

    w 7atta fi soussa lili 7ketli 3ala s7abha eli kol marra ybadlou el dar, w ybadlou el thneya w ma yemchiwech fard wa9t etccc bech yet3almou el Coran, 7asilou ma na3rafch blastou kifech bech yel9aha :)

    ردحذف
  16. انا نتصور انهم يعملوا فيه من باب الحذر :)

    ردحذف
  17. wena netfakkar eli wa9t yfi9ou bejme3a moutadaynin yet9ablou fi dar we7ed yhezzouhom lel 7abs :)

    en tout cas y a pas de fumée sans feu :p

    3ala kol ..

    ردحذف