بعد ما شابت هزوها للكُ تابت

و أخيرا سهل ربي ومشيت ليوم للجمعية القرآنية بحذا جامع الفتح في بنزرت. قيدت في أواخر سبتمبر (وأنت وقتاش بش تقيد؟) وقالولي الدروس يبداو في أكتوبر. مشيت ليوم ياخي الحمد لله لقيتهم في أول درس. على أول ما دخلت استقبلتني أصوات الصغار يقراو في القرآن وريت ملصقة عالحيط لوائح بأساميهم .. الأطفال .. محلاها كلمة ومحلاه الواحد كيف يحفظ ويتعلم القرآن وهو صغير مش كي حالي بعد ما شاب هزوه للكتاب ..هرمنا عمري 29 سنة، لا تباركلك يا بن علي..يعطك داء !

تفكرت كيف كنت صغيرة متنقلة للسنة الثالثة ابتدائي .. أنا وأختي التوأم قيدونا في الروضة الإسلامية. في الصباح عالخوى نحفظو القرآن على يدين سي فوزي التومي .. هوكا يجيبوه ساعات في حنبغل .. وبعد مرتو تقرينا الحساب وتسبقلنا في جدول الضرب متع وذني. وكان سي فوزي صعيب، تبسيمة لا و كي ريتو في التلفزة حسيت الي شي ما تبدل ..

 مرة حلمت الي غلطت وعطاني طريحة، صبحت عالصباح نحكي فيها ال أمي وأخوتي..أمي قتلي ما عادش تحكي حلمة خايبة راي تصير.. قعدت يدي على قلبي ومشيت نهارتها وأنا نعس عالتنفيسة وندعي في ربي بش يتعدى النهار على خير.. وقداش فرحت كيف وفات الحصة وما صارلي شي، مشيت كالعادة بش نقرى شوية حساب، المعلمة خرجت وقالتلنا هاني راجعة، مشات وجات تلقاني فوق الطاولة نصيح ولا انقز ولا نشطح برا لوج .. المهم فرحت بيا وعملت معايا اللازم وعلمتني نهارتها شنوة معناها جدول .. الضرب. كليت ما كتب وروحت إلى البيت فرحا مسرورا، في الآخر الحلمة تحققت في يومها، شنوة هو ولا مرتو؟ كيف كيف المهم طريحتي كليتها هههه

يا حسرة .. تو كبرت ما عادش متع ضرب .. ونسيتو جدول الضرب .. كالنهار قدام بياعة الكتب 9*8 ما لقيتهاش بالوقت، جاب ربي ما قلتلهاش راني مهندسة ههه يزي هوكة حشمت قدام روحي فيه البركة .. ما خيبها البركة، كنا باركين عنا توا بالقليلة 23 سنة، بن علي كان محرم علينا الخبز والماء، خبز الروح والماء الي يرد الروح، الناس كانوا يتقابلو بالسرقة في ديار بعضهم بش يتعلمو القرآن، كل مرة في دار يدخلو ويخرجو بالواحد بالواحد يا ولا حوال هاذي بلاد ؟ هذا مش هبال؟ الحمد لله ما دام الحال..

الحمد لله وربي يرحم الشهداء، . سألت بعض الأخوات وين يقريو؟ وراوني السال دخلت، السلام عليكم.. نلقى الأخت الي تقري فينا ما يجيش عمرها حتى 20 سنة، صوتها يلعلع تبارك الله، واثقة من روحها وصبورة وعارفة روحها علاش قادمة.. القاعة كبيرة برشة وفيها طواول وكراسي وديكور متع صغار.. أنا قعدت في صفة الصغار .. ههه الي ما بين ال20 وال30. ومقابلتنا صفة النساء الكبار مال45 وأنت طالعة .. منهم مرا كبيرة بالقدا كي جاتها ورقة الحضور قالت للمعلمة ما نعرفش نكتب بالعربي هاو بش نكتب بالسوري .. ناري عليك يا تونس ..ههه

ضحكت المعلمة وقالتلها ميسالش مالا تمشي تحضر مع جماعة محو الأمية تو يبداولك بال ب و ال ت .. قالتلها المرا أي باهي أما تو بش نكمل معاكم الحصة هاذي أنا داري بعيدة... وقتها بصراحة تنرفزت قلت برا عاااد بش تعطلنا هاذي.. ياخي كان تلهيت في همي وجهلي كان خير .. الله لا تربحك يا بن علي (مرة أخرى) خاطر العز هذا ما كانش متوفر.. بدينا يا سيدك بن سيدك بسورة مريم وما أحلاها من سورة..

كهيعص

أول آية عدينا فيها ما كتب من ربي وبديت نتعلم في القواعد وحروف المد ونقص عسلكم والتقميرات بأبيات الشعر لحروف الإخفاء والإدغام وووو ..وكل وحدة فينا تقرى .. أول وحدة مرا مسكينة تهجي، تحسها عندها مشكلة في العربية أصلا فما بالك بالتجويد .. والي بعدها صوتها عالي وتحسها فرحانة بيه والي بعدها أمنا الي مسكينة مزالت ما تعرفش تكتب بالعربي والي طلعت ناس ملاح ومالي كنت نغزل عليها وليت نحبها  ثم مرا أخرى ما شاء الله صوت وتجويد.

وأخيرا ننتقلوا إلى صفة الأطفال الي قدي وأصغر هه فما زوز بنات طلبة لولى تبارك الله صوت وقراءة والي بعدها صوت نسائي غاية في الرقة كاينها تغني .. والمعلمة تقلهم أحسنت ثم جا طريق الطفلة الي بحذايا طلعت على قدها مسكينة و أخيرا جا طريقي كهيعص بكالصوت الهايل متاعي ما قتليش أحسنت المعلمة والي بعدي أتعس وأتعس هه تعاسة

شنعمل ال عمري ؟ هاذاكا صوتي الحمد لله مش خايب أما البنات صواتهم ياسر باهيين، الغلطة غلطتهم وزيد طلعوا قاريين من قبل مش كي حالي أجهل من صباطي في ميدان التجويد والتلاوة (ما نعرفش الفرق بيناتهم بالضبط هاذوما) حاصيلو ما حسيتش بالوقت .. قلت سبحان الله كان جيت في ساعة تاريخ ولا عربية ولا الي هو راني روحي طالعة ..

خرجت راسي معبي بالقواعد الي تعلمتهم .. فرحانة وفخورة ببنات بلادي ونسائها المتعلمات العالمات الي يعلمو في الجهلة الي كيفي كيفاش يتقرى كتاب الله و فما دروس في السيرة والحديث والفقه وعلوم القرآن وهذا الكل بلاش، ما عندك كان معلوم الانخراط في الجمعية 30 د سنويا ... لكن فما شكون حتى ال30د هاذي تصعب عليه. أنا واقفة نسأل عالأوقات .. وفما طفلة عينيها يلمعو بالفرحة قتلي أنت أول مرة تجي؟ قلتلها أي، قتلي حتانا ماللي سمعت جيت نجري .. مسكينة طالبة ربي ينجحها والمرا الي لاهية بالتقييد قالتلها تجم تخلصها ال30 بالتقسيط في عقلك .. قالتلها الطفلة أي من مصروفي .. لازمني بالشوية.

برا شوف مصروفها قداش ومع هاكة بش تحاول تفضل منو طلبا للعلم .. قداش شي يعمل الكيف، نغزرلها كايني طفلة صغيرة نهار العيد .. ربي يثبتها ويوفقها .. وربي يعاونا الناس الكل، ديما بين عينيا حديث الرسول صلى الله عليه وسلم : خيركم من تعلم القرآن وعلمه ..

وحسب تجربتي البسيطة جداااا كي تتعلم القرآن على أصولو تولي تحشم على روحك بش تقراه "نورمال" كاينو شكون يجري وراك، كي تتعلم التجويد تولي تخشع أكثر في الصلاة وتتمتع بيها، كيف كل حرف تعطيه قدرو وتنطقو في حقو تستشعر أكثر عظمة الخالق الي أنت واقف بين يديه وتحاول تحسن صوتك وقرائتك كاينك في اختبار من اختبارات الدنيا ... وخاصة إذا كان الإنسان يشغل وقتو بتعلم القرآن ما عادش يلقى وقت للتفاهات وما عادش يحمل يسمع سقط المتاع مالأغاني المايعة الي تهيج الغرائز والكلها حب وكلب وآهات .. قلبك إذا تعبى بالقرآن وقوى فيه اليقين والإيمان معادش يحمل لهو الحديث واللغو والبهتان .. ربي يهدينا ويهديكم لطريق الرشد ولتعلم القرآن ..

حاصيلو أنا نقرى (محلاها كلمة نقرى قداش توحشتها .. بكاتني) نهار الأحد ان شاء الله من الساعة 14 للساعة 15.30 . سويعة ونص في الجمعة والباقي اجتهاد شخصي، المسألة مسألة همم، ان شاء الله ناوية نشري كراسة وأقلام ملونة بش نقيد فيها القواعد الي تعلمتهم، نحب كراستي مزينة وفيها عصافير، نحب نشري كتاب يعاوني مش هكة خير؟

 أنا بديت نقرا وأنت وقتاش؟ وقتاش بش تقرا باسم ربك الأعلى؟

والله لا عذر لنا بعد اليوم أبدا !