بنت بلادي راك حرة

ما نكذبش عليك، المرة هاذي كلامي موجه ليك، و ليك وحدك زاده، كان فما وليد لهنا ماذا بيه يخرج و يسكر الباب وراه، خلينا بنات صافي، خليوني نحكي  لنباصي ... و هاني نحكي بالتونسي بش ما يفهمنا حتى براني...

أختي لبارح ريتك و نعرف وين، لا في شط بحر و لا في الحلفاوين، ريتك في محطة باب سعدون متع الكيران، ريتك و يا ليتني ما ريتك.. شطر ظهرك عريان و (fill in the blanks).... على برة، يا بنتي علا ش راك حرة؟ كون ذكرة )مش ذكرى( علاش التجودير؟ قلة الذوق و التقوعير؟ و سامحني في الكلمة : قلة الحياء زادة. ماو كي باش تعري عري بذوق عالأقل، تحب تلبس لقشة قماش ما تسترش حتى أختك الصغيرة، تحب تلبس كيما باميلا أندرسون و شكيرة؟ باهي للا أما كمل للآخر، ما تاقفليش في شطر الثنية و تخليني ميتة بالحشمة و مكوية، للا غادي أكل اللقشة المحنونة يلبسوها عاللحم، مش هاني عريت ظهري و الماشي و الجاي يتفرج في حمالة صدري، راك خليتلي عقلي في يدي، أول مرة نرى هالمنظر، و لشكون تحرقس يا مرت لعور، لكالأشكال اللي تحوص لا تسيب لا كبيرة لا صغيرة، لا اللي تدبي عالحصيرة. تو عجبك أكل المواطن اللي جا يبزنس فيك؟ سخانة ربي و ريقو البارد زاد على ما بيك ؟ ياكل فيك بعينيه، يضحكلك يمدلك في سنيه، آش يحب عندك شبيه؟

يا بنتي، يا أختي راك غالية، راك باهية، يا تونسية، كون حرة خليك ذكية، ما تخليش الطماعين يشبعوا فيك هكاكة هدية. لكل مقام مقال، حتى لعرى فيه فن و أنواع و أشكال. أما لواش عليك؟ باهي تو كي عريت شطر ظهرك و كالعضام خارجة، وجهك أصفر و كلاتك شمس القايلة و لون السوتيان عرفو اللي ماشي لتبرصق و اللي جاي مالعالية؟ باهية حالتك هكه في وسط أكل الأمة الزرقة؟ اللي صام و اللي فطر، اللي غزرلك و اللي قحر، حتى أنا قحرتلك ما نكذبش عليك، قلت شبيها هاذي هبلت؟ من أنتم؟ و خذيتلك تصويرة تذكارية، نوريها لحفار قبري، بش يتفرج بالمكشوف في الحضارة و الرقي و الرفاهة المنزلية، الرفاهة المنزلية؟ أي تو عندي خمسين سنا ما نصابوتي  في الدين كان بالعراء و الغناء... أوه عليا قداش نخرم، أكهو يزيك، اللي فيك مكفيك، علاش نزيد نفضح فيك، مش لازم تونس الكل تعرف لون ... "عينيك"، يزي ال 200 فرطاس اللي في المحطة و أنت يا ناري ماشي في بالك حاطة الحطة. آه يا فاطمة و إلا بثينة و إلا شسماك ربي، زعمة فما منكم برشة؟ و إلا فك عليا منحبش نسمع، خليني طرشة.

إن شاء الله لا.. نعرف برشة يعريو و بالقوي زادة، رجال تونس الله يكون في عونهم، أما الحق التجوبير متاعك ما ريتو عند حتى وحدة. باهي بركة كثرت عليك، آه حقا بنت بلادي بالله ركح الجو في المترو خليه هادي، راك ساعات تبدى قاعدة و لابسة شوية ديكولتي ماشي في بالك أمورك هانية ماكش ديفازي و ولد بلادك واقف بحذاك يرمي عينو على غرادة، تلقاه عندو نظرة استشرافية تقدمية تخوللو حتى بش يطلع على لون ملابسك الداخلية، راهي حشومية. و لا أنت يللي لابسة سورية قفاليها متعاركين، متباعدين شوية رد بالك و أقرى حسابك.

و أخيرا أختي يا باهية، يللي تستحلى للروب الخفاف و الجوبات في الصيف، هوما صحيح يعملو 66 كيف أما ما عندكش فكرة قداش ترنسبرون، ما تفيقش بيهم كي تشريهم في الحانوت، أما جرب أخرج بيهم في الشمس وإلا آقف بيهم عالأوتوروت، كان ترى روحك كيفاش إلما تندبهم.. ملغير ما نزيد نتكلم و تعرفني مانيش نفلم.

بنت بلادي راك حرة، قداش حبيت ننصحك من مرة، أما ما لقيتش كيفاش نقولهالك، قعدت غصة في قلبي نرا لعوج و نسكت و قلبي يبكي .. رانا بنات و نعرفو بعضنا، نعرفك ما تحبش تخلي روحك للعينين، نعرف فيك بذرة خير حتى كان حاسة روحك ما بين البينين، نعرف حتى كان مش متحجبة تجم تكون خير من 200، حتى المتحجبات للأسف مش مقصرين، ساعات تراهم تقول هذا ربي شقال، هذا هو الدين؟ الضيق و القصير و المشعشع و الكشطة فوق الراس و الصباط أن مود قوموا تصحروا و حالة تبكي، خليك حرة يا أختي الحجاب راهو مسؤولية، و أنت زادة تعز عليا، يا غالية، يا تونسية، صل عالنبي و اسمع اش قال و انس اللي كتب المقال:

ثبت عن النبي صلى الله عليه وسلم أنه قال : " صنفان من أهل النار لم أرهما بعد : رجال معهم سياط كأذناب البقر يضربون بها الناس ، ونساء كاسيات عاريات مائلات مميلات على رؤوسهن كأسنمة البخت المائلة ، لا يدخلن الجنة ولا يجدن ريحها ، وإن ريحها ليوجد من مسيرة كذا وكذا " رواه أحمد ومسلم في الصحيح .

الشرح : 

هذا الحديث فيه إخبار عن صنفين من الناس لم يرهما النبي صلى الله عليه وسلم ، يظهران بعد مضي زمنه صلى الله عليه وسلم ويكون مصيرهما إلى النار لعصيانهما ، وقد عدَّ العلماء ظهورَ هذين الصنفين من أشراط الساعة الصغرى ، وهما :

الصنف الأول : رجال معهم سياط... ، والمراد بهم من يتولى ضرب الناس بغير حق من ظَلَمَة الشُّرَط أو من غيرهم ، سواء كان ذلك بأمر الدولة أو بغير أمر الدولة .

الصنف الثاني : نساء كاسيات عاريات مائلات مميلات على رؤوسهن كأسنمة البخت المائلة .

قال النووي في المراد من ذلك : " أَمَّا ( الْكَاسِيَات العاريات ) فمَعْنَاهُ تَكْشِف شَيْئًا مِنْ بَدَنهَا إِظْهَارًا لِجَمَالِهَا , فَهُنَّ كَاسِيَات عَارِيَات . وقيل : يَلْبَسْنَ ثِيَابًا رِقَاقًا تَصِف مَا تَحْتهَا , كَاسِيَات عَارِيَات فِي الْمَعْنَى . وَأَمَّا ( مَائِلات مُمِيلات ) : فَقِيلَ : زَائِغَات عَنْ طَاعَة اللَّه تَعَالَى , وَمَا يَلْزَمهُنَّ مِنْ حِفْظ الْفُرُوج وَغَيْرهَا , وَمُمِيلَات يُعَلِّمْنَ غَيْرهنَّ مِثْل فِعْلهنَّ , وَقِيلَ : مَائِلَات مُتَبَخْتِرَات فِي مِشْيَتهنَّ , مُمِيلات أَكْتَافهنَّ , وَقِيلَ : مَائِلات إِلَى الرِّجَال مُمِيلات لَهُمْ بِمَا يُبْدِينَ مِنْ زِينَتهنَّ وَغَيْرهَا . وَأَمَّا ( رُءُوسهنَّ كَأَسْنِمَةِ الْبُخْت ) فَمَعْنَاهُ : يُعَظِّمْنَ رُءُوسهنَّ بِالْخُمُرِ وَالْعَمَائِم وَغَيْرهَا مِمَّا يُلَفّ عَلَى الرَّأْس , حَتَّى تُشْبِه أَسْنِمَة الإِبِل الْبُخْت , هَذَا هُوَ الْمَشْهُور فِي تَفْسِيره , قَالَ الْمَازِرِيّ : وَيَجُوز أَنْ يَكُون مَعْنَاهُ يَطْمَحْنَ إِلَى الرِّجَال وَلا يَغْضُضْنَ عَنْهُمْ , وَلا يُنَكِّسْنَ رُءُوسهنَّ .... "