هديتي لكل التونسيين


أنا قطرة دم واسمي حياة 

أنا تبرع بيا إنسان كريم يعطي في دمو توة سنين مليي عمروو 18 سنة

هو متعود على مراكز نقل الفقر وبنوك التهميش والبونيات المتنقلة

في هذا المركز يعرفوه ورغم هاذا تُجرى عليه الفحوص اللازمة من سين وجيم

هو آمن بالعطاء ولأنو حب البلاد هو أسمى القيم 

اختار  يعبر عليه بالدم

تونس تحتاج لياسر متبرعين 

ولمثلي أنا وإخواتي فما ياسر محتاجين

التبرع بالدم أخيب تبرع

خاطر فيسع ينساووك وفي أعيادهم ومناسباتهم وانتخاباتهم يطفييووك

،يقتلوك مرتين مرة بالرصاص ومرة بالنسيان، شعب مريض بالألزهايمر ما فيهش أمان




،همو كان في قفتو وكرشو لا سيب عيد نصارى ولا مسلمين، صغير كبير كريسماس وهالويين، وبعد يقلك أنتم فاشلين  وأحنا ماناش خالطين

يا ناس شبيكم نسيتو زين العابدين؟ راجل كنا نشوفو فيه في كل وقت وحين 

نسيتو خطابو العظيم؟ نسيتو شعمل فينا 23سنة؟ وينهم البرامج والملفات ويني الكتب والأقلام ويني الأفلام الوثائقية والأعمال الفنية الي تصور  تاريخ وجرائم بن علي؟

 شبينا كي نجبدو عليه تقولولنا يزيو من جبدان القديم؟ على هاكة فيلم كيما هذا ممنوع من العرض والمخرج متاعو توة مهدد بالقتل؟!!  ا

نسيتو "ثقافة وفن وكورة" وعجبتكم قناة العايلة؟

شبي ولّاو 3 سنين مرزوقي هي النظام القديم وتحكيو على تونس قبل الثورة تقولش عليها كانت جنة على وجه الأرض؟ 

يا مرتزقة التجمعيين؟ يا من لا حياء لكم ولا دين

شبي كي هللي عندو عاهة أخلاقية يقول في آخر الحلقة  خلي ترجع تونس محلاها كيما كانت ما يوقفوش المنشط ويقلو حدك فم احترم تاريخ البلاد ودماء الشهداء وعقول المشاهدين؟

علاش قامت ثورة كي أحنا لاباس؟

نسيتو التشغيل استحقاق يا عصابة السراق

نسيتو شغل حرية كرامة وطنية

نسيتو تونس تونس حرة حرة والتجمع على برة

نسيتو يا شعب ثور ثور على بقايا الدكتاتور؟

نسيتو الشهيد خلى وصية لا تنازل عالقضية؟

الشهيد خلى حسرة في القلب وغصة الظلم وأهلو يبكيو عالعدل الي ما خذاش "مجراه والحقيقة الي ما ظهرتش والقناصة إلى قال عليهم سي "الباجي فبحيث" إشاعة

إن شاء الله تكون إشاعة أنو الشعب يعاود ينتخب جلادو ويزيد يبوسلو يديه وسقيه ويعمل كيما دليلة المفتاحي في مسلسل ليام كيف الريح وقت باست يد خوها السارق الظالم الكذاب فتحي الهداوي وقتلو وعينيها تشتول بالدموع اليد إلي سرقتني وخانتني وضربتني باش نبوسها

فبحيث يزينا من ثقافة الحمامة البيضاء متع بوس خوك وما صار شي واتقوا دعوة المظلوم واتقوا سؤالا تسألوه يوم القيامة وتفكرو ربي راهي الدنيا فانية فارغة

وتو نخليكم مع الفنان الكوميدي الي ما حفظش درسو مليح ويهجي فيه، الزعيم في المشهد الأخير من مسرحيته المضحكة المبكية إلي فيسع نسيناها أو حبونا ننساوها، هاذي غناية ليييكم لالالالالااااااا




0 commentaires:

Enregistrer un commentaire