8/30/2011

الوصايا العشر في فن العيد والتعييد


 أوصي نفسي وإياكم بما يلي :

1)    الساعة مش دوب ما المفتي يقول غدوة عيد تهجمو عالتليفونات و تبداو تعيدو، هاهي بالشوية حتى الغدوة بعد صلاة العيد. نورمالمون تعملو لحظة صمت على روح الفقيد رمضان الي يرد فينا الروح كل عام و تدعيو دعوة باهية يا ربي يعيدو علينا سنين عديدة و أزمنة مديدة أما بلاش البوب متع كوكا و جديدة

2)    بالنسبة للي يصبحو راقدين نهار العيد مش دوب ما تقوم شعرك مغوف و وجهك ما غسلتوش تمشي تعيد وتبوس علا شعملتلك أمك المغبونة؟ برة أغسل حالتك الساعة و حط شوية برفام و تفضل عيد عالوالدة وبوسها و عنقها و وريها حتى مرة في العام الي انت تحبها أما غير مش مشلق


3)    الناس التي تمشي تصلي صلاة العيد السنا تبارك الله الصلاة على بكري برشة والناس بصفة عامة يسهرو ليلة العيد "بحيث" ماذا بيكم ما تصبحوش تسريو عالصباح وتقيمو في الناس من غطاية نومهم كانش الي تعرفوهم يقومو بكري وقتها ما فيها باس ويعطيكم الصحة من فوق.

4)    حاجة أخرى للناس الي تصلي صلاة العيد كي توفى الصلاة ما ذابيكم تعيدو عالي بحذاكم الكل الي تعرفوهم والي ما تعرفوهمش، مش آخر يد في الصلاة نهز شلاكتي ونهرب بش ما نبوسش فلانة وفلتانة قال شنوة ما نعرفهاش. في بالكم الي من علامات الساعة أنو الناس ما عاد تكلم كان الي تعرفهم؟ عالأقل في العيد نتفكرو أخلاق الإسلام ونفشو السلام


5)    بالله نهار العيد لازمنا نفرحو مش انغصو عيشتنا وعيشة ولادنا و ندوروها جبانة.. شنية هاذي نهار عيد و النساء تتباكى في القبورات ؟  مش لبارح كنت تضحك لاباس عليك؟ جاية ليوم تنصب في منوحة لواه ؟ اسمو عيد مش نكد والي يحب ربي يسمع كلامو التفلسيف لا. هاني لبارح en mode  "و نحن على فراقك يا رمضان لمحزونون" ليوم صبحت en mode عيد و ديما يمشي.

6)    تو بش ندخلو في الصحيح يزينا مالبدع متع الانترنات ومجتمع المعلومات وعالم الاتصالات الي فرق لعباد وبعدنا على بعضنا و أحنا فرد بلاد، التعييد عالأقارب والأحباب بالتليفون مش مقبول وما عندوش مبرر خاصة للي عندهم الجهد والصحة والفلوس بش يتحركو. والله عملنا العار الخو يبعش لأختو missage  ؟ تي ما خيب راسك Digage. وزيد تلقاه الميساج حاضر ما كلفش روحو حتى باش يكتبو هههه من أنتم ؟ تي كان مش عيد الإسلام رانا ما عادش نراو بعضنا اللطف تي فيقوا على وضعكم ويزيو مالأنانية والتقرنيط المادي والمعنوي.

وخاصة أكل الفايسبوك بالله الي يبدل photo de profil مكتوب عليها عيد سعيد ما يسسماش عيد راهو، و الي يكتب status ويطلقو في الفضاء الافتراضي شوف ال 300 فرطاس الي ami   معاهم يقراووه ولا لا مش هذاكة التعييد زادة،  en tout cas هذاكة التعييد بودورو و 3ème choix  و صنع شنوة. كي قدر عليك ربي و حاجتك بالعباد برالهم عالأقل للحيوط متاعهم (ماو زعام التوانسة في التخربيش عالحيوط). بالطبيعة مش لكل أما عالأقل الكعبتين الي يعزو عليك وما عندكش نوامرهم.

7)    بالله الي يجيوه ولاد الحومة يدقو عليه ولا يضربو في الناقوس ما يطيحش يسب ويلعن ولا يسكر وذنيه ويعمل مولى الدار مش هوني، العيد فرحة الصغار وما فيها باس كي تعطيهم المهبة تي حتى طرف قشقش الي في مكتوبك يفرحو بيه تفكر روحك قداش صرفت على كرشك في الشهر الفضيل و على شهاويك، يظهرلي كي تمد صرف 10 ألاف لولاد الجيران راسك مش بش يتعرى و مزيتها أكثر منها وثوابها عند ربي كبير وحتى كان ما عندكش أعطيهم حتى طرف حلوى. ما عندكش؟ اضحكلهم ضحكة باهية "تبسمك في وجه أخيك صدقة" وطبس عليهم بوسهم، عام كامل و انت مكشبر و نافخ روحك عالخلق ليوم خوذ كنجي ميسالش.

8)    بالله الي شرا حوايج جدد يلبسهم نهار العيد مش يخبيهم للعودة المدرسية و لا لأصحابو وقت السهرية وتلقاه يمشي يعيد على عمو بالقديم قال شنوة تفوريخ. ولا تلقاه لاباس عليه والخزانة بش تبرك بالدبش وهو يعدي نهار العيد بحوايج الدار وعاطي للهم كار علاش وخي؟ "و أما بنعمة ربك فحدث".


9)    ان شاء الله كان هدانا ربي وتقابلنا و صلنا الرحم قول وفعل مش بالتليفون و الفايسبوك يراه مهلوك .. ما توليش الاجتماعات العائلية فرصة للتقطيع والترييش والحركات الرياضية بالفم والعينين بالغمز واللمز و توقيف الوذنين، يهديكم راو الدين أخلاق، يزينا مالكذب في القول والصدق في النفاق.

10)   راو الي حرام في رمضان حرام في غيرو الغناء المايع والكليبات الساقطة و الكلام الزايد و الشراب والسهريات والعوادات والطبالات  ... والي حلال ومطلوب وفرض في رمضان فرض في غيرو الصلاة والصلاة في أول وقتها والخشوع في الصلاة والحجاب والبر وحسن الأخلاق والذكر والقرآن و.... ولذا ما نبداوش نتهوبلو على بكري وندخلو في الدخلي.

ختاما عيدكم مبروك وكل عام والشعب التونسي يتيم لا يعيد عليه لا المبزع ولا بوه لحنين، لا المخلوع ولا المفصوع ولا حرمو المصون و لا باعث القناة ولا هم يحزنون.

كل عام و القذافي يدرقش كالفار من حفرة الى حفرة.

 كل عام والشعب الليبي يلقنلنا في دروس  في الرجولية والبطولة الحقانية فماش ما اننحييو لبلادة والركاكة والتنبير الماسط والمحقرانية.

كل عام و الشعوب العربية تنتفض على متحكميها أحكم الله قبضته عليهم.

عيد ليس بسعيد و الأقصى شهيد

عيد ليس بسعيد للمتشردين في الصومال

وللمحرومين في غزة

وللمفجوعين في سوريا

وللمكلومين في اليمن

لكن عيد مبارك .. بأية حال وسبحان مغير الأحوال القوي القدير المتعال !

هناك 6 تعليقات:

  1. السلام عليكم
    إن شاء الله كل عام و انتي و المسلمين الكل بألف خير :)
    ماصعبك :P
    لازمني نطبق وصيتك الثامنة خاطرني مازلت بحوايج الدار :فيفي: و لاهية نقرا في درس من محور جراحة الأعصاب :آي راسي:
    نهارك طيب و شكرا على الإتصال ، وحدك و برا ؛)

    ردحذف
  2. و عليكم السلام ورحمة الله وبركاته

    تي اسكت بركا أنا بيدي بحوايج الدار ههه أما لابسة فوقهم جلباب حلو :تتبهنس: وزيد أنا ما شريتش شوالق السنا :'( ما لقيتش :'(

    وخيتي كان بش تبدل وتزين ال درس الأعصاب السماح مش لازم هههه

    يا بنتي زايد كبرنا وهرمنا والعيد للصغار :/

    ربي معاك ليلي ولا شكر على واجب :)

    ردحذف
  3. السلام عليكم

    والله عندك ألف حق في هل الكلمة المزيانة

    مش آخر يد في الصلاة نهز شلاكتي ونهرب بش ما نبوسش فلانة وفلتانة قال شنوة ما نعرفهاش

    شفت كيفاه...العوج؟ أنا وصيتك يا بريما عجبتني برشا راهو. قلي فالابل عيد كهو؟ :/

    أيا كل عام وأنت بخير

    ردحذف
  4. و عليكم السلام ورحمة الله وبركاته

    أهلا بخويا عيدك مبروك و كل عام وأنت إلى الله أقرب :)

    "الجملة هاذي مافهمتهاش " قلي فالابل عيد كهو

    xD

    ردحذف
  5. ربي يهدينا الكل :)
    وعيدك مبروك منجية وإن شاء الله ديمة تقري وتوري :)

    ردحذف
  6. w ntabba9 3la rou7i esse3a :D émin !

    aidek mabrouk 7ouma !

    ردحذف

Cher journal

Cher journal En ce temps de sécheresse artistique et d'absence de vrais tourments et de réels "problématiques" dans ...