7/26/2011

و أنت نحي التليكوموند من يدك و برا قيد



أنت وأنت و أنت نحيوا التلكوموند من يديكم و اسمعوني : الثورة التونسية هداوهالنا هناني بناني، 1% من الشعب التونسي لمزمر التاعب، لا عملتها لا أنا و لا أنت، عاد ما يزيش نستهلكو في الشبه حرية، حرية التقنقين و التخرنين و التخربيش عالحيوت (الحقيقية و الافتراضية)، ما يزيش طلعنا صبابة ماء عاليدين في الحكاية و زيد حتى الانتخابات ما نحبوش ننتخبو؟ مش عيب؟ أخطا راسي و اضرب؟ تي راسك هو لول الي بش تجي في راسو كان كل واحد يخمم كيفك، تو يقعدوا فيها كان الكلاب الضالة و المضلة متع التجمعات الدستورية ال pas du tout  ديمقراطية.

يا خويا وفاءً للشهداء و بش ما تشمتوش فينا الأعداء قوموا، تحرحزوا، سيبوا التليكوموند، يزيو مالفرجة براو قيدوا. باهيشي تو؟ يقودونهم إلى الجنة بالسلاسل. في بالي بيكم بش تقولولي شكون قالك جنة و كي تطلع نار؟ إمالا في الحالة هاذي لواش "عملناها" الثورة من أصلو؟ ماحنا كنا كويسيييين ؟ نزعدو في التاي و نتفرجو في الكورة و نشقوا فطرنا في رمضان عالقمار و نشربو في الكوكا؟ تعلاش المصروف الزايد بررا عااااااد ولات فيها انتخابات و ريق بارد... ما خلاوناش نقيلو على راحتنا هالصيف المحنون. يا ولادي هذا مش جنون؟

Qui ne risque rien n’a rien ok ?

بش تقلي الانتخابات مسؤولية؟ اي صحيح "نا ماني حقوقي"، أما عدم الانتخاب مسؤولية أكبر و أشنع.. يا سيدي، يا للا برا قيد و هوكا مزال قدامك الوقت ان شاء الله بش تعمل راي من هنا لل23 أكتوبر، بجاه ربي براو قيدوا، بالله براو مارسو شوية ديمقراطية  عطاوهالكم الشهداء هدية، يهديكم رانا هرمنا من أجل هذه اللحظة التاريخية .

و علا هاكة دمعت عينيا كي مشيت نقيد في غرغور القايلة مش في لعشية، كي ريت لبلاكة هذية :



 حسيت بثمرة الثورة الشبابية التونسية السلمية المثالية، حرام علينا ناقفو في شطر الثنية، حرام علينا نوقفو الحلمة التونسية، تفكرو هاك الراجل تفكرو هاك البنية، الي مات و الي تكسر و الي تيتم و الي مشى ضحية..و الي في الحبس و الي جندوه بالسيف عليه في الخدمة العسكرية... ناس تتشهى في الحرية .. و ناس تلعب بيها.. هاذي هيا

أخوتنا في ليبيا مازالو غارقين و أحنا جانا الماء جانا الضو جاتنا الانتخابات نقوللها مهاءا ما حاشتناش بيك؟ ابعدني لا تذيني لا نذيك؟ يلي تخمم هكة مش عيب عليك؟ يزيونا مالانبطاحية و تكتيف ليدين و الساق فوق ساق و الفرايجية، الله لا تربحك يا بن علي و يا البورقيبية، أهيا مخلفات 50 سنة دكتاتورية ، قالو لا للديمقراطية، ياخي بجدكم تحكيو و لا تفدلكو عليا؟ يزيو مالفرجة سيبو التليكوموند، براو قيدوا، شدوا لي كوموند ..

و السلام عليكم و رحمة الله و بركاته

ليست هناك تعليقات:

إرسال تعليق

Cher journal

Cher journal En ce temps de sécheresse artistique et d'absence de vrais tourments et de réels "problématiques" dans ...