7/23/2011

سيبولي خويا سيبولي أمان الله




كيف كنت صغيرة أنا و أختي عمرنا 6 سنين، أمي كانت حامل و عزيزتي الله يرحمها قالتلنا أمك عندها وليد، نهار 10 جويلية  روحت أمي مالصبيطار في يدها بيبي، أحنا ريناها و أحنا قمنا نصيحو : خويا جا، خويا جا. كنا 3 بنات في الدار ... ولينا 4. عزيزتي طلعت غالطة و لا يمكن قعدت تحلم لآخر لحظة، حبت على طفل ياخي جاتها طفلة. ولدها أبو البنات صحة ليه..

أختي الصغيرة هاذي اسمها أمان، كانو بش يسميوها أماني و هكة ما نخرجوش مالإيمان و الأمينة و الحنان أسامي أخوتها.. أما وقتها طلع بنك الأمان عملولو إشهار في التلفزة، أمي و بابا عجبهم الاسم ياخي سماوها أمان.. معناها خذاو اسمي و طلعو الهمزة الفوق، بالطبيعة ما عجبتنيش لحكاية، كل مرة نتهنتل، نسمع ..ماااان، نعيط: نععععم ؟ لا لا مش عليك على أمان.. و كي نطفي الضو، يطلعوا عليا.. حاجة عادية.

أمان كيف كبرت ما حبوش يصدقو الي اسمها أمان، مرة يقولولها أمال مرة يسحايبوها طفل تي حتى في البرمي كتبولها إيمان..

يقول القايل علاش نحكيلكم في هالحكاية؟ ما نعرفش، يمكن على خاطر في اللخر طلعت عندي بالحق خويا اسمو أمان، يمكن خاطر في اللخر عزيزتي ما كانتش غالطة على طول الخط، يمكن خاطر أكل طفل  الي عمرو 25 سنة و الي غار على بلادو و اجتهد و حاول يحمي الثورة بطريقتو، الطفل هذاكة الي يجي قد خويا الصغير طلع بالرسمي خويا، ماهوش ولد أمي و بويا لكنو خويا، خويا في الإنسانية، خويا في الإسلام، في ممارستو للوطنية، في غيرتو عالثورة التونسية و خويا ليوم في الحبس، خويا أمان الله الي مزال طالب رماووه في الحبس و جندوه بالسيف عليه و عفسو عالقانون و على حقوق الإنسان شماتة فيه، علاش شعمل؟ قتل روح؟ يتم طفل؟

وينكم يا دعاة الحرية و الديمقراطية الي بالملوخية؟ وينكم يا دعاة زقزقة العصافير و المساواة؟ وينكم ليوم شبي الحس بات؟ هذاكة مش ولد تونس ما عندوش أم تبكي عليه ما عندوش أخوات؟

كي كنت صغيرة صحت خويا جا خويا جا، في اللخر خويا ماجاش ليوم كبرت مع توم و مازلت نستنى توا عندي 23 سنة،  سيبولي خويا سيبولي أمان الله ! حرام عليكم خافوا الله !

هناك 4 تعليقات:

  1. عجبني إنتقالك من حكاية أختك لحكايتك خوك و خويا ؛) يعطيك الصحة :)
    ربي يفك أسرو ،و ربي يقدر الخير في بلادنا

    ردحذف
  2. آمين بارك الله فيك يا أخيتي :)

    ردحذف
  3. vraiment ya3tik sa77a, ta façon d'écrire est formidable, j'ai beaucoup aimé l'article, surtout qu'il me concerne un peu puisque c'est moi ''Amen'', amouna ta7founa :)

    ردحذف
  4. loool hawka ma7kitech 3lik chkont 3amla feyya w 9addech men tri7a klitha fi jortek :pp

    ردحذف

Cher journal

Cher journal En ce temps de sécheresse artistique et d'absence de vrais tourments et de réels "problématiques" dans ...